Komiteti për Produktet Mjekësore për Përdorim nga Njerëzit (CHMP) i Organizatës Evropiane të Barnave (EMA) ka dhënë mendim pozitiv për Mosquirix (vaksina kundër malaries dhe hepatitit B) për përdorim jashtë Evropës. EMA ka testuar vaksinën për kualitet, siguri dhe efikasitet, dhe ka vlerësuar raportin mes përfitimit dhe rrezikut për vaksinën në fjalë. Sipas rezultateve, vaksina nuk arrin të krijojë mbrojtje të plotë ndaj malaries, por e ulë rrezikun për infektim, dhe në rast infektimi, ndihmon në lehtësimin e simptomave.
Sipas publikimit në The Lancet, vaksina u është dhënë fëmijëve të moshave 5-17 muaj dhe 6-12 javë në tre doza. Shëndeti i fëmijëve të vaksinuar është ndjekur gjatë 3-4 viteve pasuese. Numri i rasteve të malaries te fëmijët 5-17 muajsh në kohën e vaksinimit është ulur 39% në katër vitet pasuese, ndërsa numri i rasteve te fëmijët 6-12 javësh në kohën e vaksinimit është ulur 27% në tre vitet pasuese. Mendohet se vaksina duhet të përdoret në kombinim me barnat ekzistuese.
WHO gjithashtu do ta testojë efikasitetin e Mosquirix dhe do të japi rekomandimin e vet. Puna për krijimin e kësaj vaksine ka filluar në vitin 1998. Është krijuar nga kompania GlaxoSmithKline me financim të pjesshëm nga Fondacioni Bill & Melinda Gates. GlaxoSmithKline ka deklaruar se nuk do të përfitojë nga kjo vaksinë dhe se do e shesë me çmim vetëm 5% më të lartë se çmimin e prodhimit, shumë kjo që do të shkojë për kërkimin e barnave të tjera kundër malaries.
Burimet:
1. http://www.ema.europa.eu/ema/index.jsp?curl=pages/news_and_events/news/2015/07/news_detail_002376.jsp&mid=WC0b01ac058004d5c1
2. http://www.thelancet.com/journals/lancet/article/PIIS0140-6736(15)60721-8/abstract
3. https://www.gsk.com/en-gb/media/press-releases/2015/gsk-s-malaria-candidate-vaccine-mosquirix-rtss-receives-positive-opinion-from-european-regulators-for-the-prevention-of-malaria-in-young-children-in-sub-saharan-africa/